可能係睇電腦太多, 我最近對眼好累, 所以冇心機正式寫東歐遊記, 但係好想講我的一單"艷遇"先!

去旅行除咗玩之外, 好多未有著落的女人都"幻想"有艷遇, 再"夢想"與一個靚仔談一切轟轟烈烈的異地戀 (可能只有我自己會諗咁多!)

首先, 同團友集合時, 我會即時飛快地掃一眼, 睇吓有冇疑似單身的靚仔先(咁其實有又點呢?), 次次不出3秒就會有結論...冇! 今次都係一樣! 唉!

但出乎意料, 今次去到外國畀我遇到靚仔噃!! 重唔只一個, 係打"3"上!

話說團裡面有3餐要自費, 第一餐係斯洛伐克, 我地自己搵咗一間地下餐廳, d嘢好味又抵食, 詳情日後補上(因為唔係呢篇的重點麻).

食飯時我攞咗相機出來影相, 但食完飯離開餐廳約一分鐘路程, 我先醒起將相機遺留係桌上, 唔記得拎走! 我怕阻住d朋友行街, 所以我話我自己返餐廳攞番相機得啦.

返到餐廳, 一個waiter都見唔到, 只見到有一桌客人(就係3個後生的金髮靚仔囉). 我搵唔到waiter, 好徬徨, 唔知點算好, 3個靚仔見我咁, 就問我有咩可以幫手. 我就話我留咗相機係度.

佢地就分頭幫我入廚房搵人, 又出去地面的餐廳招客counter搵人問. 佢地唔只靚仔, 重好好人添!!

最後其中一個靚仔好快幫我搵到, 我好開心道謝之後就走咗.

領隊聽完件事, 問我點解唔問靚仔攞電話？理由好簡單, 因為我、怕、 醜!!唉!!

返香港後我同d朋友再討論呢件事, 我好後悔咁話：「其實唔使問佢地攞電話吖, 我應該有新意d反客為主問：Can I give you my telephone number?』

同學V話：「哈哈！係呀, 然後你再講：Call me if you want to.』

我話：「唔係，應該係話：Call me even if you don't want to.』夾硬來. 哈哈哈！

我就係咁, 次次當面都怕醜, 乜都唔識講. 事後就諗一大堆無聊嘢, 死未?